Raza Musani 
غزہ : مصر اور غزہ کے درمیان رفح کراسنگ کھل گئی لیکن پہلے دن پانچ مریضوں سمیت صرف چھبیس فلسطینیوں کو آمدورفت کو اجازت مل سکی۔ رفح سرحد کھلنے سے فلسطینیوں کو پہلے دن کوئی بڑا ریلیف نہ مل سکا۔ کراسنگ کے دونوں جانب موجود سینکڑوں فلسطینی اور مریض پورا دن انتظار کرتے رہے۔ جبکہ مصر میں ایمبولینس مریضوں کو لے جانے کی منتظر رہیں۔
غزہ کے لیے انسانی امداد توقعات کے مطابق فراہم نہ ہو سکی۔ سخت سیکیورٹی پابندیوں اور پیچیدہ طریقہ کار کے تحت پانچ مریضوں اور ہر ایک کے ساتھ دو اہلخانہ کو غزہ سے باہر جانے کی اجازت دی گئی۔ جبکہ مصر سے صرف گیارہ فلسطینی غزہ میں داخل ہوسکے۔ فلسطینی قومی کمیٹی کے سربراہ علی شعث نے کہا ہے کہ رفح کراسنگ کے لیے رجسٹریشن کے طریقۂ کار اور ترجیحی فہرست جلد جاری کی جائے گی۔ انہوں نے کہا کہ رفح کراسنگ کی بحالی محض ایک انتظامی قدم نہیں بلکہ غزہ کے عوام کے لیے امید کی ایک نئی کھڑکی ہے۔
