ایرانی بحریہ نے مارشل جزائر کے جھنڈے والا جہاز قبضے میں لے لیا

تہران: ایرانی بحریہ نے خلیج عُمان میں مارشل جزائر کے جھنڈے والے جہاز کو قبضے میں لے لیا۔ ایرانی میڈیا کےمطابق مارشل جزائر کے جھنڈے والا جہاز ایرانی کشتی سے ٹکرا گیا۔ جس سے عملے کے دو ارکان لاپتا اور کئی زخمی ہوگئے۔ ایرانی بحری افواج نے بعد میں خلیج عُمان میں فرار ہونے والے جہاز کو روک لیا اور اس کا رُخ ایران کے ساحلی پانیوں کی طرف موڑدیا۔ امریکی بحریہ نے واقعہ کے بارے میں ایک مختلف مؤقف پیش کیا ہے۔اس نے ایک بیان میں کہا ہے کہ ایرانی فورسز نے خلیج عمان میں بین الاقوامی پانیوں سے گذرتے ہوئے مارشل جزائر کے جھنڈے والے آئل ٹینکر ایڈوانٹیج سویٹ کو قبضے میں لے لیا۔ امریکی بحریہ نےایران کی جانب سے بحری جہازوں کو مسلسل ہراساں کرنے اور علاقائی پانیوں میں جہاز رانی کے حقوق میں مداخلت پرتنقید کی اور اس آئل ٹینکر کی فوری رہائی کا مطالبہ کیا ہے۔