Raza Musani 
دی ہیگ : عالمی عدالت انصاف نے اسرائیل کو فوری طور پر رفح آپریشن روکنے اور رفح کراسنگ کھولنے کا حکم دے دیا۔
دی ہیگ میں واقع عالمی عدالت انصاف نے غزہ میں جنگ بندی پر عمل درآمد کےلیے جنوبی افریقا کی درخواست پر فیصلہ سنادیا۔
عدالت نے 2-13 کی اکثریت سے فیصلہ دیا۔ فیصلے میں کہا گیا کہ رفح میں اسرائیلی اقدامات سے فلسطینی عوام کو شدید خطرات لاحق ہیں، غزہ میں انسانی زندگی کے لئے درکار تمام تر انفرااسٹرکچر تباہ ہوچکا ہے۔ غزہ کے شہری انتہائی تشویشناک انسانی اور معاشی حالات سے دوچار ہیں، رفح میں فوجی آپریشن سے انتہائی افسوسناک انسانی سانحہ جنم لے سکتا ہے۔ عالمی عدالت انصاف نے فیصلے میں کہا ہے کہ اسرائیل ایک ماہ کے دوران غزہ پٹی میں صورتحال بہتر بنانے کے اقدامات کی رپورٹ بھی عدالت میں پیش کرے۔ فیصلے میں مزید کہا گیا کہ اسرائیل بین الاقوامی تفتیشی ٹیم کے ارکان کو غزہ پٹی میں داخل ہونے کی اجازت دے۔ آئی سی جے کے فیصلے میں اسرائیل کو اقوام متحدہ کے فیکٹ فائنڈنگ مشن کو غزہ تک رسائی دینے کا حکم دیا گیا ہے اور کہا کہ اسرائیل غزہ میں امداد کی رسائی کے لیے رفح بارڈر کراسنگ فوری کھولے۔
