امریکا میں گن کلچر کے خوفناک نتائج، ٹیکساس کے ایک اسکول میں فائرنگ سے 19 بچوں سمیت 21 افراد ہلاک

ٹیکساس : امریکا میں گن کلچر کے خوفناک نتائج کا سلسلہ رک نہ سکا۔ ریاست ٹیکساس کے ایک اسکول میں فائرنگ سے 19 بچوں سمیت 21 افراد ہلاک ہو گئے۔ ہلاک ہونے والے دوسری سے چوتھی جماعت تک کے بچوں کی عمریں سات سے دس سال تک بتائی گئی ہیں۔ ٹیکساس کے علاقے یوویلدے کے ایک ایلمنٹری اسکول میں 18 سالہ نوجوان اسلحہ لے کر داخل ہوا اور فائرنگ شروع کر دی۔ جس کے نتیجے میں 18 طلبا اور ایک ٹیچر ہلاک اور 14 طلبا شدید زخمی ہوئے جنہیں طبی امداد کے لیے اسپتال منتقل کردیا گیا۔ 18 سالہ حملہ آور پولیس کی فائرنگ سے مارا گیا ہے۔ حملہ آور نے اسکول پر حملے سے قبل اپنی دادی کو بھی گولیاں مار کر قتل کیا۔ اس نے تھوڑی دور گاڑی کھڑی کی اور چھوٹی بندوق لے کر سکول میں داخل ہوا۔
امریکی صدر جوبائیڈن نے ہلاک شدگان کے لواحقین سے دلی ہمدردی کااظہار کیا ہے۔ ان کا کہنا ہے کہ بندوق رکھنے والوں کے خلاف اٹھ کھڑے ہوں اور کانگریس پر دباؤ ڈالیں کہ بندوق رکھنے کے حوالے سے موزوں رولز بنوائے۔ درد ناک حملے پر وائٹ ہاوس کی جانب سے سوگ کا اعلان کیا گیا ہے۔ واقعے پر امریکی پرچم سرنگوں رہے گا۔ 2012 کے بعد امریکا میں کسی اسکول پر میں کیا گیااب تک کا بدترین حملہ ہے۔ 2012 میں سینڈی ہوک میں بھی ایسا ہی واقعہ ہوا تھا جس میں 20 بچے اور عملے کے چھ افراد ہلاک ہوئے تھے۔