Raza Musani 
جنیوا : اقوام متحدہ کے انسانی حقوق کے ادارے نے خبردار کیا ہے کہ اسرائیلی پشت پناہی سے جاری صیہونی آبادکاروں کی سفاکیت مغربی کنارےمیں فلسطینی وجود کو براہ راست کمزور کرنے کا سبب بن رہی ہے۔
اقوام متحدہ کے ادارے نے ایک بیان میں واضح کیا کہ گذشتہ جمعہ سے اتوار کے درمیان مغربی کنارے کے مختلف علاقوں میں صیہونی آبادکاروں نے کم از کم 10 سنگین حملے کیے جن میں فلسطینی شہریوں اور ان کی املاک کو نشانہ بنایا گیا۔ بیان میں اس امر پر زور دیا گیا کہ مغربی کنارے کے اندر فلسطینیوں کی جبری منتقلی بین الاقوامی قانون کے تحت جنگی جرم ہے اور یہ انسانیت کے خلاف جرم کے زمرے میں بھی آ سکتی ہے۔ اقوام متحدہ کے ادارے نے اس بات کی بھی تصدیق کی کہ قابض اسرائیل پر لازم ہے کہ وہ فلسطینی مقبوضہ علاقوں میں اپنی غیر قانونی موجودگی کا خاتمہ کرے اور تمام اقسام کی غیر قانونی صہیونی آبادکاری کو فوری طور پر روکے۔
