عرب سربراہ کانفرنس کا غزہ میں بین الاقوامی امن فورس تعینات کرنے کا مطالبہ

مناما: عرب سربراہی کانفرنس میں اسرائیل سے غزہ پٹی میں جاری وحشیانہ جارحیت فوری طور پر روکنے اور غزہ پٹی سے مکمل فوجی انخلاء کرکے فلسطینی علاقوں میں بین الاقوامی امن فوج تعینات کرنے کا مطالبہ کیا گیا۔ عرب سربراہی کانفرنس کے آغاز میں میزبان ملک بحرین کے شاہ حمد بن عیسیٰ آل خلیفہ نے مشرق وسطیٰ میں قیام امن کے لئے بین الاقوامی کانفرنس بلانے کا مطالبہ کیا۔ سعودی ولی عہد شہزادہ محمد بن سلمان نے اپنے خطاب میں کہا کہ غزہ پٹی میں جاری اسرائیلی جارحیت کسی بھی طرح نا قابل قبول ہے۔
کانفرنس کےاختتام میں جاری اعلامیے میں غزہ پٹی میں جاری اسرائیلی جارحیت روکنے اور محاصرہ ختم کرنے کا مطالبہ کیا گیا اور کہا گیا کہ فلسطینی علاقوں سے اسرائیلی فوج کو مکمل طور پر انخلا کرواکر بین الاقوامی امن فوج تعینات کی جائے۔ اعلامیہ میں رفح کراسنگ کی فلسطینی سائیڈ پر اسرائیلی افواج کے قبضے کی مذمت کرتے ہوئے فلسطینیوں کی جبری بے دخلی کو سختی سے مسترد کیا گیا۔ بحرین کانفرنس کے شرکاء نے اسرائیل سے مطالبہ کیا کہ وہ رفح بارڈر کو خالی کرے تاکہ انسانی ہمدردی کی بنیاد پر غزہ پٹی کے متاثرین کو امداد فراہم کی جاسکے۔