ایران اور امریکا کے درمیان مذاکرات جمعہ کو استنبول میں ہوں گے

استنبول: ترکیہ کی میزبانی میں ایران اور امریکا کے درمیان جوہری پروگرام پر نئے مذاکرات جمعہ کو استنبول میں ہوں گے۔ خبر رساں ادارے رائٹرز کے مطابق مذاکرات کی قیادت امریکی ایلچی اسٹیو وٹکوف اور ایرانی وزیر خارجہ عباس عراقچی کریں گے۔ قطر، سعودی عرب، متحدہ عرب امارات، مصر اور دیگر ممالک کے نمائندے بھی مذاکرات میں شریک ہوں گے۔ ذرائع کا کہنا ہے کہ بات چیت دو طرفہ، سہ فریقی اور کثیر فریقی فارمیٹس میں ہوگی۔
یہ پیش رفت ایران کے سکیورٹی چیف علی لاریجانی کے بیان کے دو دن بعد سامنے آئی، جنہوں نے کہا تھا کہ امریکا کے ساتھ جوہری مذاکرات کے فریم ورک پر پیش رفت ہو رہی ہے۔ گذشتہ روز ایرانی صدر مسعو پزشکیان نے مذاکرات کی منظوری دی تھی۔ ایرانی وزارت خارجہ کے ترجمان اسماعیل بقائی نے کہا ہے کہ تہران مذاکرات کے تمام پہلوؤں اور امکانات کا بغور جائزہ لے رہا ہے۔ ایران کے لیے وقت اہم ہے اور وہ غیر منصفانہ پابندیوں کے جلد خاتمے کا خواہاں ہے۔