Raza Musani 
تہران : ولی امر مسلمین آیت اللہ سید مجتبیٰ خامنہ ای کے سینئر مشیر علی اکبر ولایتی نے متحدہ عرب امارات کو خبردار کیا ہے کہ وہ ایران اور خلیج فارس کے 3 جزائر پر خود مختاری کو چیلنج کرنے سے گریز کرے۔ ولایتی نے کہا کہ تاریخی اور فوجی اعتبار سے متحدہ عرب امارات ایران کا مقابلہ نہیں کر سکتا۔ ولایتی نے سوشل میڈیا پلیٹ فارم ایکس پر اپنے بیان میں اقوام متحدہ کی جنرل اسمبلی میں امارات کی جانب سے تنب اور ابو موسیٰ جزائر کی ملکیت سے متعلق حالیہ دعوؤں کو مسترد کیا اور کہا کہ یہ تینوں جزائر ہمیشہ ایران کا حصہ رہیں گے انہوں نے کہا کہ ایک ایسا ملک، جس کی سیاسی زندگی ابھی نصف صدی تک بھی نہیں پہنچی، اقوام متحدہ کے پلیٹ فارم سے ان جزائر پر دعویٰ کر رہا ہے جنہیں گزشتہ صدیوں کی تاریخی دستاویزات اور نقشوں میں ایران کے نام سے درج کیا گیا ہے۔
علی اکبر ولایتی نے امارات کو یہ مشورہ بھی دیا کہ وہ اپنی سلامتی کے لیے بیرونی طاقتوں پر انحصار کرنے کے بجائے اپنے ہمسایہ ممالک کے ساتھ اچھے تعلقات قائم کرے۔ سابق ایرانی وزیر خارجہ نے کہا کہ ہمسایہ باقی رہتا ہے اور مہمان چلا جاتا ہے، خطے کے تجربے نے ثابت کیا ہے کہ درآمد شدہ سکیورٹی کی ایک میعاد ہوتی ہے۔
