جنوبی کوریا کو اپنے تحفظ کی قیمت ادا کرنا ہوگی ، ٹرمپ کا سخت پیغام

امریکاکا جنوبی کوریا میں اپنے 28ہزار فوجیوں کا کرایہ 5ارب ڈالر کرنے کا مطالبہ،جنوبی کوریا کی 90کروڑ ڈالر میں 13فیصد اضافے کی پیشکش مسترد
کورین ارکان پارلیمنٹ زیادہ اضافے پر آمادہ نہیں، جنوبی کوریا امیر ملک ہے ،ہم اسے تحفظ فراہم کرتے ہیں لہذا اسے مناسب ادائیگی کرنا چاہئے،ٹرمپ کی تنبیہ
واشنگٹن (نیوز ڈیسک)جنوبی کوریا نے امریکا کی جانب سے اپنے فوجیوں کے کرائے میں بھاری اضافے کا مطالبہ مسترد کردیا ہے ، جبکہ امریکی صدر ڈونلڈ ٹرمپ نے کہا ہے کہ جنوبی کوریا کو اپنے تحفظ کی قیمت ادا کرنا ہوگی، غیر ملکی میڈیا کے مطابق امریکا اور جنوبی کوریا کے درمیان فوجیوں کے اخراجات کا معاملہ طے نہیں ہوسکا، جنوبی کوریا نے امریکا کو پیش کش کی ہے کہ وہ 28ہزار 500امریکی فوجیوں کے سالانہ کرائے 90کروڑ ڈالر میں 13فیصد اضافے کیلئے تیار ہے ،جسے امریکا نے مسترد کردیا ہے اور اس نے 5ارب ڈالر سالانہ اداکرنے کا مطالبہ کیا ہے ،لیکن جنوبی کوریا کیلئے ایسا کرنا ممکن نہیں کیونکہ معاہدہ کے تحت اخراجات میں اضافہ کیلئے پارلیمنٹ سے منظوری لینا ہوگی جس کیلئے ارکان پارلیمنٹ آمادہ نہیں،امریکی صدر ڈونلڈ ٹرمپ نے کہا ہے کہ ہم ان کے تحفظ کیلئے بہترین اقدامات کررہے ہیں،ہم دونوں کے درمیان بہتر ین تعلقات ہیں لیکن ہم چاہتے ہیں ہمارے ساتھ شفاف اور برابری کا سلوک کیا جائے، انہو ں نے کہا کہ جنوبی کوریا ایک امیر ملک ہے ،وہ ٹیلی ویژن سیٹ بناتا ہے وہ جہاز بناتا ہے اور وہ سب کچھ ہی بناتا ہے ،اسے ہم تحفظ فراہم کرتے ہیں لہذا اسے اس کی مناسب ادائیگی کرنا چاہئے۔