شہید رئیسی کی حکومت نے استقامتی تحریکوں کی ہر سطح پر مدد کی، حسن نصر اللہ

بیروت : حزب اللہ کے سربراہ سید حسن نصراللہ نے کہا ہے کہ شہید ابراہیم رئیسی جس عہدے پر بھی رہے مثالی رہے اور وہ خادم ملک و ملت تھے۔ ضاحیہ میں ایرانی صدر اور ان کے ساتھیوں کی یاد میں منعقدہ تعزیتی اجتماع سے خطاب میں حسن نصراللہ نے ایران کی حکومت اور قوم کو اس المناک حادثے پر تعزیت پیش کی اور کہا کہ شہید رئیسی کا ہیلی کاپٹر حادثہ ایران اور عالمی سطح پر انتہائی دردناک اور افسوسناک واقعہ تھا جس نے ہمیں سوگوار بنا دیا۔ حسن نصراللہ نے کہا کہ محاذ استقامت، لبنان کی قوم اور حکومت ان لوگوں کے ساتھ اپنی وفاداری کا اعلان کرتا ہےجو ہمیشہ ان کے شانہ بشانہ رہے ہیں اور ہم اس مصیبت کے موقع پر ولی امر مسلمین آیت اللہ خامنہ ای، ایران کی حکومت اور قوم کو تعزیت پیش کرتے ہیں۔ سید حسن نصر اللہ نے شہید صدر رئیسی کی تشییع جنازہ میں دسیوں لاکھ افراد کی شرکت کو حضرت امام خمینیؒ اور شہید جنرل قاسم سلیمانی کے جلوس جنازہ کے بعد تاریخ کا تیسرا بڑا جلوس جنازہ قرار دیا۔ سید حسن نصراللہ نے خارجہ پالیسی کے میدان میں شہید آیت اللہ سید ابراہیم رئیسی کی حکومت کی کامیابیوں کا ذکر کرتے ہوئے کہا کہ ان کی صدارت کے مختصر دور میں مغرب کے ساتھ تعلقات کی سطح برقرار رکھتے ہوئے مشرق کے ساتھ تعلقات میں فروغ آیا اور ایران متعدد بین الاقوامی تنظیموں کا رکن بنا۔ حزب اللہ کے سربراہ نے کہا کہ شہید آیت اللہ رئیسی کی حکومت نے استقامتی تحریکوں کی ہرسطح پر مدد کی اور صیہونیوں کی مخالفت شدید تر کر دی۔ سید حسن نصراللہ نے کہا کہ ایران کے شہید وزیر خارجہ حسین امیر عبداللّہیان لبنان، فلسطین اور استقامتی تحریکوں سے قلبی لگاؤ رکھتے تھے۔ ان دونوں شہیدوں کی خدمات بے مثال ہیں، ہم ان کی گرانبہا خدمات کے شکرگزار ہیں۔