سعودی وزیر خارجہ کا دورہ شام، صدر بشار الاسد سے ملاقات

دمشق : سعودی عرب اور شام کے درمیان بارہ سالہ کشیدگی کے بعد تعلقات معمول پر آنے لگے۔ سعودی وزیر خارجہ فیصل بن فرحان سرکاری دورے پر شام کے دارالحکومت دمشق پہنچے اور شامی صدر بشار الاسد سے ملاقات کی۔ جس میں انہوں نے شام کے بحران کے سیاسی اور ایک ایسے ماحول کے قیام پر زور دیا جس میں امداد شام کے ہر حصے تک پہنچے۔ سعودی وزارت خارجہ نے کہا ہے کہ شہزادہ فیصل بن فرحان کا دورہ شام کے مسئلے کے سیاسی حل میں دلچسپی کو ظاہر کرتا ہے۔ سعودی عرب شام کے بحران کے ایسے حل کا حامی ہے جو اس کے اتحاد، سلامتی، استحکام اور اس کی عرب شناخت کو برقرار رکھے اور اسے اس کے عرب ماحول میں اس طرح بحال کرے جس سے اس کے برادر عوام کی فلاح وبہبود میں مدد ملے۔ گذشتہ ہفتے سعودی وزیر خارجہ اور ان کے شامی ہم منصب فیصل المقداد کی جدہ میں ملاقات ہوئی تھی۔ملاقات کےبعد مشترکہ اعلامیہ میں کہا گیا تھا کہ شام میں تصفیے کیلئے مذاکرات اور تنازعے کے ایسے سیاسی حل پر بات کی گئی جو ملک کی وحدت کو برقرار رکھے۔