یمن میں سعودی طیاروں کے اسکول اور رہائشی دیہات پر حملے، 7 افراد شہید، 35 زخمی

صنعا: سعودی جنگی طیاروں نے یمن کے مختلف صوبوں میں فضائی حملے کیے، جن میں ایک اسکول اور رہائشی دیہات کو نشانہ بنایا گیا. سعودی جنگی طیاروں نے تعز کے شمال مغرب میں واقع التعزیہ ضلع کے الروضہ اسکول کو تیسری مرتبہ نشانہ بنایا، جس کے نتیجے میں اسکول کی باقی ماندہ عمارت بھی تباہ ہوگئی۔ تعز صوبے کے مویہ چوک کے بازار پر دو حملوں میں 7 افراد شہید اور 35 زخمی ہوئے۔ یمنی حکام نے ان حملوں کو شہریوں کو نشانہ بنانے والا واقعہ قرار دیتے ہوئے سعودی عرب کو سنگین نتائج سے خبردار کیا ہے. سعودی فورسز کے داغے گئے چار میزائلوں نے یمن کے شمالی شہر صعدہ کے مشرقی علاقوں کو بھی نشانہ بنایا۔ صعدہ کے قطابر ضلع کے الثابت علاقے میں رہائشی دیہات پر توپ خانے اور میزائلوں سے بھی حملے کیے گئے۔