Raza Musani 
تہران: ایرانی پاسداران انقلاب کی بحریہ نے کہا ہے کہ امریکی حملوں کے جواب میں آبنائے ہرمز میں 3 تیل بردار جہازوں اور دیگر علاقوں میں امریکا سے منسلک 3 بحری جہازوں کو نشانہ بنایا گیا ہے۔
ایرانی پاسدارانِ انقلاب کی بحریہ نے کہا ہے کہ آبنائے ہرمز میں غیر مجاز راستے سے گزرنے والے تین آئل ٹینکروں کو نشانہ بنایا، جبکہ دیگر علاقوں میں بچوں کی قاتل امریکی فوج کے تین جہازوں کو بھی نشانہ بنایا گیا۔ اس کارروائی کے بعد پاسداران کی بحریہ نے سخت اور واضح انتباہ جاری کرتے ہوئے خلیجِ فارس اور آبنائے ہرمز کے قریب موجود تمام بحری جہازوں اور کشتیوں سے کہا ہے کہ امریکی دہشت گرد فوج کے دھوکے میں نہ آئیں اور غیر مجاز آبی راستوں سے گزرنے کی کوشش میں کسی بھی مشکوک نقل و حرکت سے گریز کریں، ورنہ آپ ہمارے نشانے پر ہوں گے۔
اس سے قبل امریکی فوج نے ایرانی جزیرے خارگ میں تین ایرانی آئل ٹینکرز کو نشانہ بنانے کا دعویٰ کیاہے۔ ایران کے دو جہازوں کو آبنائے ہرمز اور ایک جہاز کو خلیج عمان میں نشانہ بنایا گیا۔ سینٹکام نے کہا کہ کارروائی ایران کی جانب سے امریکی نیوی کے جہازوں کو بیلسٹک میزائلوں سے نشانہ بنانے کے جواب میں کی گئی۔
