غزہ میں پھر قیامت برپا، بیت لاہیہ، نصیرات اور غزہ سٹی پر حملے، 100 سے زائد شہادتیں

غزہ : صیہونی فوج نے غزہ میں ایک بار پھر قیامت برپا کردی۔ بیت لاہیہ اور نصیرات پر بمباری سے سو سے زائد فلسطینی شہید اور درجنوں زخمی ہوگئے۔ اسرائیلی جنگی طیاروں نے بیت لاہیہ میں دو مکانات پر بم برسائے اور میزائل داغے۔ حملے میں دونوں عمارتیں ملیا میٹ ہوگئیں اور پچھتر فلسطینی شہید اور کئی زخمی ہوگئے۔ جنگی طیاروں نے نصیرات پناہ گزین کیمپ میں بھی رہائشی علاقے کو نشانہ بنایا۔ بمباری سے 29 فلسطینی شہید ہوئے۔ جبکہ غزہ سٹی میں گیارہ فلسطینی جان سے گئے۔ شہدا میں خواتین اور بچوں کی اکثریت ہے۔ جبالیہ پناہ گزین کیمپ کے مغربی علاقوں پر بھی فضائی حملہ کیاگیا۔ اسرائیلی فوج کے توپ خانے نے نصیرات پناہ گزین کیمپ کے شمال میں بھی گولہ باری کی۔