وزیراعلیٰ پنجاب کی جانب سے تحفظات دور کرنے کی خبریں من گھڑت ہیں، ایم ڈبلیو ایم

اسلام آباد: مجلس وحدت مسلمین پاکستان کے مرکزی ترجمان مظاہر شگری نے کہا ہے کہ وزیراعلیٰ پنجاب پرویز الہی کی جانب سے ایم ڈبلیو ایم کے تحفظات دور کرنے کی خبریں من گھڑت ہیں۔ پاکستان تحریک انصاف کی اعلیٰ قیادت یا وزیر اعلیٰ پنجاب اور مجلس وحدت مسلمین کے درمیان تاحال کسی سطح پر کوئی باقاعدہ رابطہ نہیں ہوا ہے۔ انہوں نے کہا کہ پنجاب حکومت نے پی ٹی آئی اور ایم ڈبلیو ایم کے درمیان معاہدے کو کوئی اہمیت نہیں دی اور مشکلات کے حل کیلئے کوئی مثبت اقدام نہیں اٹھایا گیا۔ ایم پی اے حافظ عمار یاسر نے پنجاب حکومت کو یرغمال بنا رکھا ہے۔ مجلس وحدت مسلمین پاکستان نے واضح کر دیا ہے کہ وزیر اعلیٰ جب تک ہمارے تحفظات دور نہیں کریں گے رکن پنجاب اسمبلی سیدہ زہرا نقوی وزیر اعلیٰ پنجاب چوہدری پرویز الہٰی کو اعتماد کا ووٹ نہیں دیں گی۔ عمران خان کے ساتھ کھڑے ہیں لیکن جس طرح کے حالات پیدا کر دیئے گئے ہیں اس صورت حال میں وزیر اعلیٰ کو ووٹ نہیں دے سکتے۔