حالیہ پیش رفت اسرائیل کی نابودی اور زوال کی جانب اشارہ ہے، سید حسن نصر اللہ

بیروت: حزب اللہ کے سیکریٹری جنرل سید حسن نصراللہ نے کہا ہے کہ مقبوضہ علاقوں میں رونما ہونے والی پیش رفت سے پتہ چلتا ہے کہ اسرائیلی حکومت کا خاتمہ اب کوئی خواہش نہیں بلکہ ایک حقیقت ہے جو مستقبل قریب میں ہو جائے گا۔ مقبوضہ فلسطین میں پیشرفت کا دھارا اس بات کی طرف اشارہ کرتا ہے کہ صیہونی زوال اور انہدام کی طرف بڑھ رہے ہیں۔ انہوں نے فلسطینی قیدیوں کو پھانسی دینے کے قانون کی شدید مذمت کی اور کہاکہ وحشی اسرائیلی دشمن کا خیال ہے کہ وہ فلسطینی مزاحمت کاروں کو دھمکیاں اور سزائے موت کا نفاذ کرکے روک سکتا ہے۔ ہم فلسطینی قیدیوں کے ساتھ اپنی یکجہتی کا اظہار کرتے ہیں، اور اس سلسلے میں اپنی ذمہ داری ادا کرتے ہیں۔ رہبر مقاومت سید حسن نصراللہ نے کہا کہ پوری مسلم دنیا اسرائیلی حکومت کے مقابلے میں فلسطینی قوم کی حمایت کرنے کی پابند ہے۔ میں فلسطینی قیدیوں، ان کے اہل خانہ اور پوری فلسطینی قوم سے مخاطب ہوں کہ لبنانی قوم ان تکالیف سے پوری طرح واقف ہے جو آپ مغربی کنارے، حوارہ، نابلس اور مشرقی القدس میں برداشت کر رہے ہیں، جیسا کہ ہم نے مصائب کا سامنا کیا ہے اسرائیلی قبضے اور بہادرانہ مزاحمت کے تمام سالوں میں۔