ماہ رمضان میں مسجد اقصیٰ میں مسلمانوں کی رسائی محدود کرنے کا منصوبہ

بیت المقدس: اسرائیلی حکام نے ماہ رمضان کے دوران مسجد اقصیٰ میں مسلمانوں کی رسائی محدود کرنے کا منصوبہ بنایا ہے۔ سابق مفتی القدس اور سپریم اسلامی کونسل کے سربراہ شیخ اکرمہ صبری نے انادولو سے گفتگو میں کہا کہ اسرائیلی انتظامیہ کا ماہ رمضان میں مسجد اقصیٰ تک رسائی محدود کرنے کا منصوبہ تشویشناک ہے۔ ماہ رمضان وسط ہفتے شروع ہو رہا ہے اور اس موقع پر مسلمانوں کی عبادت اور روزہ داری متاثر ہو سکتی ہے۔شیخ صبری نے بتایا کہ اسرائیلی حکام نے پہلے ہی کئی نوجوانوں کو مسجد میں داخل ہونے سے روکا ہے اور مغربی کنارے سے آنے والے نمازیوں کے لیے پابندیاں نرم نہیں کریں گے۔ انہوں نے کہا کہ اس کا مطلب ہے کہ ماہ رمضان میں مسجد میں نمازیوں کی تعداد پچھلے سالوں کے مقابلے میں کم ہوگی، جو عبادت کی آزادی کے حق کے خلاف ہے اور مسلمانوں کے روزے کے مہینے کے مشاہدے میں خلل ڈالے گا۔