بورڈ آف پیس کے اجلاس میں غزہ کے لئے فنڈز کی توثیق ہوگی

قاہرہ: غزہ کی انتظامی امور کمیٹی کے سربراہ علی شعث نے کہا ہے کہ امریکی صدر ڈونلڈ ٹرمپ کے بورڈ آف پیس کا اگلے ہفتے اجلاس امدادی اور تعمیر نو کے فنڈز کی توثیق کے لیے اہم ہوگا۔ علی شعث نے مصر کے سرکاری چینل القاہرہ نیوز سے گفتگو میں بتایا کہ غزہ میں امدادی سامان اور تعلیمی مواد کے داخلے کے لیے منصوبہ تیار کیا جا رہا ہے۔ انہوں نے کہا کہ یورپی یونین، اقوام متحدہ اور عرب ممالک کے ساتھ متعدد اجلاس ہوئے ہیں اور انہیں امداد، بحالی اور تعمیر نو کے لیے وعدے موصول ہو چکے ہیں۔ انہوں نے کہا کہ بورڈ آف پیس کا اجلاس انیس فروری کو واشنگٹن میں ہوگا تاکہ ضروری فنڈنگ اور امدادی وعدوں کی تصدیق کی جا سکے۔انہوں نے کہا کہ بڑی مقدار میں امداد پہنچانے کے لیے متعدد اقدامات کیے جا رہے ہیں اور فلسطینی عوام مصری قیادت کے شکر گزار ہیں کہ وہ غزہ میں ان کے حقِ واپسی کو تحفظ فراہم کر رہی ہے۔