پاک ایران اقتصادی اور دفاعی تعاون پر متفق

جنرل باجوہ کا ایرانی ہم منصب کو فون، سرحدی صورتحا ل پر تبادلہ خیال
اسلام آباد(نیوز ڈیسک)پاکستان اور ایران نے مشترکہ اقتصادی اور دفاعی تعاون کے فروغ پر اتفاق کیا ہے ، آرمی چیف جنرل قمر جاوید باجوہ نے ایرانی ہم منصب میجر جنرل باقری کو ٹیلی فون کیااور پاک ایران سرحد کے قریب سیکورٹی فورسز پر حالیہ دہشت گرد حملے، سرحدی سیکورٹی اور کورونا کی صورتحال پر تبادلہ خیال کیا گیا،دونوں کمانڈرز نے سرحد کے اطراف سیکورٹی اقدامات مزید سخت کرنے کے عزم کا اعادہ کیا اور کووڈ 19 کی صورتحال اور ایسے معاملات سے نمٹنے کے لیے بارڈر ٹرمینلز میں مزید بہتری کی ضرورت پر بھی گفتگو کی، آرمی چیف نے کہا کہ پاکستان نے سرحد پر باڑ لگانے کا عمل شروع کیا ہے، بارڈر سیکورٹی، اسمگلنگ کی روک تھام کو یقینی بنانے کے لیے باہمی دو طرفہ تعاون کی ضرورت ہے آرمی چیف نے باہمی احترام، عدم مداخلت اور برابری کی بنیاد پر علاقائی امن و استحکام کے لیے پاکستان کی خواہش کا اعادہ کیا۔