Raza Musani 
کراچی : کراچی کے علاقے صدر میں دھماکے سے ایک شخص جاں بحق اور 8 زخمی ہوگئے جبکہ متعدد گاڑیوں کو بھی نقصان پہنچا۔ مرنے والے کی شناخت عمر صدیق کے نام سے ہوئی ہے، جو بزرٹا لائن کا رہائشی تھا۔ اور وہ جناح اسپتال میں ملازمت کرتا تھا۔ ترجمان جناح اسپتال کا کہنا ہے کہ زخمیوں کے جسم پر بال بیئرنگ کے زخم آئے ہیں۔
پولیس کے مطابق دھماکہ مرشد بازار کے قریب ایک بیکری اور ہوٹل کے باہر ہوا جہاں رات کے اس پہر کافی چہل پہل ہوتی ہے۔ دھماکے سے قریبی ہوٹلوں اور رہائشی عمارتوں کے شیشے ٹوٹ گئے۔ دھماکے کے وقت کوسٹ گارڈ کی گاڑی وہاں سے گزر رہی تھی، جس کے قریب ہی دھماکا ہوا۔ ڈی آئی جی ساؤتھ شرجیل کھرل نے کہا ہے دھماکا خیز مواد سائیکل میں نصب تھا، کوئی ادارہ یا کوئی مخصوص گاڑی ٹارگٹ نہیں تھی۔
