عالمی یوم القدس پر شہر شہر ریلیاں، فضائیں اسرائیل مردہ باد کے نعروں سے گونج اٹھیں

کراچی: جمعتہ الوداع پر دنیا بھر میں لاکھوں افراد امام خمینی رحمۃ اللہ کے فرمان پر فلسطینیوں سے یکجہتی کیلئے سڑکوں پر نکل آئے۔ دنیا بھر میں رمضان کا آخری جمعہ بطور یوم القدس منایا گیا جس کی اپیل بانی انقلاب اسلامی امام خمینیؒ نے کی تھی۔ نماز جمعہ کے بعد پاکستان۔ ہندوستان۔ افغانستان۔ ایران ۔ بنگلہ دیش۔ فلسطین اور لبنان سمیت بیشتر مسلم ممالک میں فلسطین سے اظہار یکجہتی کیلئے ریلیاں نکالی گئیں۔ ریلیوں میں مردوں کے علاوہ خواتین اور بچوں کی کثیر تعداد شریک ہوئے۔ شرکا نے پلے کارڈز اور بینرز اٹھا رکھے تھے جن میں فلسطین کی آزادی کے حق میں نعرے درج تھے۔ مظاہرین نے بیت المقدس اور مسجد اقصیٰ پر اسرائیلی قبضے کی مذمت کی اور امت مسلمہ سے مطالبہ کیا کہ وہ صیہونی جارحیت روکنے کیلئے عملی اقدامات کریں۔ سب سے بڑی ریلی ایران کے دارلحکومت تہران میں نکالی گئی جس میں لاکھوں افراد نے حصہ لیا۔ شرکا نے آزادی چوک پر جمع ہوکر اسرائیل سے اظہار برات اور فلسطینیوں سے یکجہتی کا اعلان کیا۔