Raza Musani 
لندن: ناروے، آئرلینڈ اور اسپین نے اٹھائیس مئی کو فلسطینی ریاست کو تسلیم کرنے کا اعلان کردیا۔ تینوں ممالک کے رہنماؤں نے کہا ہے کہ مشرق وسطیٰ میں امن کی خاطر فلسطین کو بطور ریاست تسلیم کرنے کا فیصلہ کیا گیا۔ ناروے کے وزیر اعظم جوناس گہر اسٹور نے کہا کہ دو ریاستی حل اسرائیل کے بہترین مفاد میں ہے۔ فلسطین کو تسلیم کئے بغیر مشرق وسطیٰ میں امن نہیں ہوسکتا۔ آئرلینڈ کے وزیراعظم سائمن ہیرس نے کہا ہے کہ مجھے یقین ہے کہ مزید ممالک اس اقدام میں ہمارا ساتھ دیں گے۔ ہسپانوی وزیراعظم پیڈرو سانچیز نے بھی اعلان کیا ہے کہ اسپین 28 مئی کو فلسطین کو بطور ریاست تسلیم کرے گا۔
اسرائیل نے فوری مشاورت کے لیے ناروے اور آئرلینڈ سے اپنے سفیروں کو واپس بلا لیا ہے۔ غیرملکی میڈیا کے مطابق یورپی یونین کے ممالک آئرلینڈ، اسپین، سلووینیا اور مالٹا نے حالیہ ہفتوں میں اشارہ دیا تھا کہ وہ مشترکہ اعلان میں فلسطین کو تسلیم کرنے کا ارادہ رکھتے ہیں۔
