Raza Musani 
نابلس : اسرائیل کی صیہونی فوج ایک بار پھر مقبوضہ مغربی کنارے کے مختلف علاقوں میں فلسطینیوں پر ٹوٹ پڑی۔ صیہونی فوج نے جنوبی مقبوضہ مغربی کنارے کے شہروں بیت لحم اور بیت جالا میں دھاوا بولا۔ فوجیوں نے فلسطینی نوجوان کے سر میں گولی ماری۔ جس سے وہ موقع پر ہی دم توڑ گیا۔ فائرنگ میں دیگر 6 افراد زخمی بھی ہوئے ہیں جن میں سے 3 کی حالت تشویشناک ہے۔ مغربی کنارے میں اسرائیلی فورسز نے عقبة جبر کے پناہ گزین کیمپ پر چھاپہ مارا۔ صیہونی فوج نے فلسطینی نوجوانوں کو گرفتار کرنے کی کوشش کی ۔ مزاحمت پر اندھادھند گولیاں چلادیں۔ایک فلسطینی نوجوان زخمی ہوگیا۔ دوسرا نوجوان بیت جالا میں اسرائیلی فوج کی دراندازی کے دوران زخمی ہوا۔ فورسز نے فلسطینیوں پر براہ راست فائرنگ کی۔ آنسو گیس کے گولے داغے اور دھویں کے شیل پھینکے۔ غرب اردن کے علاقے طولکریم میں فائرنگ سے ایک نوجوان زخمی ہوگیا۔ جبکہ ایک کو گرفتار کرلیا گیا۔
