امریکا سے جوہری مذاکرات جمعہ کو عمان میں ہوں گے، عراقچی

تہران: ایرانی وزیر خارجہ عباس عراقچی کا کہنا ہے کہ امریکا کے ساتھ جوہری مذاکرات جمعے کو مسقط میں ہوں گے۔ امریکی عہدیدار نے بھی مسقط میں مذاکرات کی تصدیق کر دی ہے۔ عباس عراقچی نے سوشل میڈیا پلیٹ فارم ایکس پر بتایا کہ امریکا کے ساتھ جوہری مذاکرات صبح دس بجے عمان کے دارالحکومت مسقط میں طے ہیں۔ انہوں نے مذاکرات کے انعقاد کے لیے عمان کا شکریہ ادا کرتے ہوئے کہا کہ تمام انتظامات مکمل کر لیے گئے ہیں۔ اس سے پہلے امریکی نیوز ایجنسی ایکسیوز نے دعویٰ کیا تھا کہ مذاکرات معطل ہوگئے ہیں۔ تاہم ایک امریکی عہدیدار نے بھی مسقط میں مذاکرات کی تصدیق کر دی۔ ادھر امریکی صدر ڈونلڈ ٹرمپ نے ولی امر مسلمین آیت اللہ خامنہ ای کو خبردار کرتے ہوئے کہا کہ امریکا خطے میں اپنی فوجی موجودگی بڑھا رہا ہے۔ انہیں بہت فکرمند ہونا چاہیے۔ انہوں نے کہا کہ ایران کے ساتھ مذاکرات جاری ہیں تاہم انہوں نے فوجی کارروائی کو بھی خارج از امکان قرار نہیں دیا۔ ٹرمپ نے دعویٰ کیا کہ امریکی حملوں کے بعد ایران ایک نئی جوہری تنصیب پر غور کر رہا تھا، جس پر امریکا نے سخت ردعمل کی وارننگ دی۔