Raza Musani 
تہران : ایرانی وزیر خارجہ حسین امیر عبداللہیان نے اپنے ایک بیان میں ایران کی جانب سے تازہ لانچ کئے گئے سیٹیلائٹ نور 2 کی جانب اشارہ کرتے ہوئے زور دیا ہے کہ کسی بھی قسم کی پابندی عظیم ایرانی عوام کی پیشرفت کو روک نہیں سکتی۔ ٹوئٹر پر جاری ہونے والے اپنے بیان میں ایرانی وزیر خارجہ نے زمین سے 500 کلومیٹر کے فاصلے پر قاصد نامی ایرانی سیٹیلائٹ کیریئر کے ذریعے نور 2 سیٹیلائٹ کی کامیاب لانچنگ کی جانب اشارہ کرتے ہوئے لکھا ہے کہ اللہ تعالی کے فضل و کرم اور ایرانی سائنسدانوں و سبز وردیوں میں ملبوس سپاہ پاسداران کے ماہرین کی محنت سے نور 2 سیٹیلائٹ، ملکی سطح پر تیار کردہ سیٹیلائٹ کیریئر قاصد کے ذریعے کامیابی کے ساتھ زمین کے مدار میں پہنچ گیا ہے۔ حسین امیر عبداللہیان نے لکھا کہ کسی بھی قسم کی پابندی عظیم ایرانی عوام کی پیشرفت کو روک نہیں سکتی۔ انہوں نے اپنے پیغام کے آخر میں لکھا کہ اسی جہادی نکتۂ نگاہ کے ذریعے آٹوموٹو انڈسٹری سمیت ہر اقتصادی و صنعتی میدان میں عالمی سطح کی پیشرفت حاصل کی جا سکتی ہے۔
