Raza Musani 
بیروت : حماس نے اسرائیل کے ساتھ نئے مذاکرات کو وقت کا ضیاع اور غیر ضروری قرار دے دیا۔ حماس کے رہنما اسامہ حمدان نے کہا ہے کہ مذاکرات کے باعث اسرائیلی فوج کو غزہ میں جارحیت جاری رکھنے کے لیے مزید وقت ملتا ہے۔ جب تک غزہ جنگ کے خاتمے کے مطالبات پورے نہیں ہوں گے حماس اسرائیل کے ساتھ مزید ثالثی مذاکرات میں دلچسپی نہیں رکھتی۔ انہوں نے کہا کہ اسرائیل کے لیے فوری طور پر غزہ کی پٹی سے انخلاء اور تمام جارحیت بند کرنے کی ضرورت ہے۔ انہوں نے اسرائیلی میڈیا کی ان خبروں کی تردید کی کہ مذاکرات منگل کو قاہرہ میں دوبارہ شروع ہوں گے۔ اسرائیلی میڈیا نے دعویٰ کیا تھا کہ پیرس میں موساد کے سربراہ ڈیوڈ بارنیا نے سی آئی اے کے ڈائریکٹر بِل برنز اور قطر کے وزیراعظم محمدبن عبدالرحمٰن الثانی کے ساتھ ملاقاتوں میں تعطل کا شکار مذاکرات کے لیے ایک نئے فریم ورک پر اتفاق کیا ہے۔ جبکہ ایک اسرائیلی عہدیدار نے کہا ہے کہ یرغمالیوں کی رہائی کے لیے حکومت کا رواں ہفتے مذاکرات دوبارہ شروع کرنے کا ارادہ ہے۔
