سوڈانی فوج اور ریپڈ سپورٹ فورس کے درمیان جدہ میں مذاکرات

خرطوم: سوڈان میں انسانی بنیادوں پر جنگ بندی کیلئے فوج اور ریپڈ سپورٹ فورس کے نمائندوں نے جدہ میں سرجوڑ لئے۔ سوڈانی فوج اور ریپڈ سپورٹ فورس کے نمائندے مذاکرات کیلئے گذشتہ روز جدہ پہنچے تاکہ جنگ زدہ علاقوں میں انسانی امداد پہنچائی جاسکے۔ دونوں متحارب افواج میں مذاکرات امریکا اور سعودی عرب کی کوششوں سے ہورہے ہیں۔ دونوں ممالک نے مشترکہ بیان میں متحارب فریقوں پر زور دیا کہ وہ جنگ بندی کی طرف جائیں۔ سعودی وزارت خارجہ کے ایک بیان میں کہا گیا کہ مشترکہ اقدام کا مقصد سوڈان میں تناؤ کی سطح کو کم کرنا ہے۔ سوڈانی فوج اور ریپڈ سپورٹ فورس نے واضح کیا ہے کہ وہ صرف انسانی بنیادوں پر جنگ بندی پر بات کریں گے۔ سوڈان میں تنازع کو ختم کرنے پر کوئی بات چیت نہیں ہوگی۔ سوڈانی فوج نے کہا ہے کہ ان کا وفد اپنے نیم فوجی دشمنوں کے ساتھ جنگ بندی کی تفصیلات پر بات چیت کرے گا۔