Raza Musani 
نیویارک : اقوام متحدہ کے سربراہ انتونیو گوتریس نے غزہ میں جنگ بندی معاہدے کے دوسرے مرحلے پر عمل درآمد شروع کرنے پر زور دیتے ہوئے کہا ہے کہ اس مرحلے کا بنیادی تقاضا اسرائیل کا مکمل انخلا ہے۔ پریس کانفرنس سے خطاب میں انتونیو گوتریس نےکہا کہ غزہ میں موجودہ جنگ بندی کو مکمل فائر بندی کے بجائے صرف فائرنگ میں کمی قرار دیا جا رہا ہے۔ جنگ بندی کے دوسرے مرحلے کی جانب بڑھنا ناگزیر ہے۔ یہی مرحلہ دو ریاستی حل پر عملدرآمد کی راہ ہموار کر سکتا ہے۔ سیکرٹری جنرل نے مغربی کنارے میں بستیوں کی تعمیر، گھروں کی مسماری، جبری بے دخلی اور غیرقانونی صیہونی آبادکاروں کے تشدد کے ذریعے دو ریاستی حل کو کمزور کرنے کی تمام اسرائیلی کوششوں کی سخت مخالفت کا اعادہ کیا۔ انہوں نے زور دیا کہ ان اقدامات کو فوری طور پر روکا جائے تاکہ غزہ، مغربی کنارہ اور مشرقی القدس پر مشتمل مستقبل کی ریاستِ فلسطین کے قیام کے لیے سازگار حالات پیدا ہو سکیں۔
