یمن سے سعودی اہداف پر حملے دگنے سے بھی زائد ہوگئے، امریکی رپورٹ میں دعویٰ

واشنگٹن : امریکی تھنک ٹینک کی ایک تحقیقی رپورٹ کے مطابق 2021 کے ابتدائی نو مہینوں کے دوران یمن سے سعودی عرب پر حملوں کی تعداد گذشتہ سال کی اسی مدت کے مقابلے میں دگنی سے زائد ہوگئی۔واشنگٹن میں سینٹر فار اسٹریٹجک اینڈ انٹرنیشنل اسٹڈیز کی اس رپورٹ میں امریکا پر زور دیا گیا ہے کہ وہ سعودی عرب کو دفاع کے لیے اضافی امداد فراہم کرے۔ رپورٹ کے مطابق یکم جنوری 2016 سے 20 اکتوبر 2021 کے درمیان یمن سے سعودی اہداف پر کل 4103 حملے کئے گئے۔ رپورٹ میں دعویٰ کیا گیا ہے کہ حوثی ملیشیا سعودی عرب میں سویلین اہداف اور خلیج میں اتحادی اہداف کے خلاف ہائی پروفائل علاقوں پر حملےکر رہے ہیں۔ حوثی جدید ترین کروز اور بیلسٹک میزائلوں کے علاوہ بغیر پائلٹ ڈرون اور دیگر ہتھیار استعمال کرتے ہوئے سعودی عرب اور خلیج کے دیگر ممالک کے خلاف شدید جنگی مہم چلا رہے ہیں۔ رپورٹ میں الزام لگایا گیا ہے کہ ایران کی انقلابی گارڈز کور کی جانب سے حوثیوں کو ٹینک شکن گائیڈڈ میزائل، سمندری بارودی سرنگیں، دھماکہ خیز مواد سے لدے ڈرونز کے لیے تربیت کے علاوہ جدید ترین ہتھیاراور ٹیکنالوجی فراہم کی گئی ہے۔