Raza Musani 
لاہور: ملک بھر میں یوم شہادت امیر المومنین حضرت علی علیہ السلام آج عقیدت و احترام کے ساتھ منایا جا رہا ہے۔ ملک کے مختلف شہروں میں آج مجالس عزاء برپا ہوئی اور ماتمی جلوس برآمد ہوئے، یوم علی کے موقع پر ملک بھر میں سیکیورٹی کے فول پروف انتظامات کیے گئے ہیں۔
شرکاء کو صرف واک تھرو گیٹس کے ذریعے داخلے کی اجازت ہوگی اور راستوں پر کلوز سرکٹ کیمرے بھی لگائے گئے ہیں۔
لاہور میں یوم شہادت حضرت علی کا مرکزی جلوس صبح مبارک حویلی اکبری منڈی سے برآمد ہوا، جلوس مقررہ راستوں پررواں دواں ہے، مرکزی جلوس کو جانے والے تمام راستوں کو کنٹینر لگا کر سیل کر دیا گیا، پولیس کی بھاری نفری حفاظتی انتظامات پرموجود ہے، جلوس کے شرکاء کی جانب سے چوک رنگ محل میں نمازظہرین ادا کی گئی، عزاداران کی سہولت کے لیے 8 پارکنگ پوائنٹس بنائے گئے ہیں جبکہ مقررہ راستوں پر ٹریفک بند ہے۔
کراچی میں ماتمی جلوس دوپہر ایک بجے نشتر پارک سے برآمد ہوا جو اپنے مقرہ راستوں سے ہوتا ہوا حسینیہ ایرانیاں امام بارگاہ کھارادر پر اختتام پذیر ہوا۔
جلوس نشتر پارک سے ہوتے ہوئے سر شاہ نواز بھٹو روڈ، فادر جیمز روڈ، ایم اے جناح روڈ، مینسفیلڈ اسٹریٹ، ریگل چوک، پریڈی اسٹریٹ، ایم اے جناح روڈ، بولٹن مارکیٹ، کھارادر، سے ہوتا ہوا حسینیہ ایرانیاں امام بارگاہ میں پہنچ کر اختتام پذیر ہوا۔
شرکاء جلوس نے ایم اے جناح روڈ پر با جماعت نماز ظہرین ادا کی۔
