میئر کراچی کی محرم سے قبل مساجد اور امام بارگاہوں کے اطراف سیوریج سسٹم درست کرنے کی یقین دہانی

کراچی : میئر کراچی و چیئرمین واٹر بورڈ بیرسٹر مرتضی وہاب نے جعفریہ الائنس کے مرکزی رہنماؤں سے ملاقات کی اور انہیں محرم الحرام سے قبل فراہمی و نکاسی آب کے موثر اقدامات کرنے اور تمام مساجد، امام بارگاہوں، مجالس کے مقامات، سبیلوں اور جلوس کے راستوں پر نکاسی آب کی تمام شکایات کے خاتمے کی یقین دہانی کرادی۔ ملاقات کے دوران جعفریہ الائنس کے مرکزی سربراہ علامہ رضی جعفر نقوی سمیت دیگر موجود تھے۔اس موقع پر میئر کراچی نے واٹر بورڈ حکام کو ہدایات دیتے ہوئے کہا کہ پرانی روایات کو برقرار رکھتے ہوئے محرم الحرام سے قبل شہر بھر میں فراہمی و نکاسی آب کی تمام شکایات کا مکمل خاتمہ کرکے شہریوں کو بہتر سہولیات فراہم کی جائیں اور تمام کھلے مین ہولز پر رنگ سلیب اور کورز رکھیں جائیں تاکہ شہریوں اور عزاداروں کو کسی قسم کی پریشانی کا سامنا کرنا نہ پڑے۔
میئر کراچی نے مزید کہا کہ تمام متعلقہ اداروں بالخصوص شیعہ علماء کرام اور جعفریہ الائنس کے رہنماؤں کے ساتھ بھرپور تعاون کیا جائے، اس کے علاہ یکم محرم الحرام تا یوم عاشورہ تک متعلقہ ضلعی انتظامیہ اور قانون نافذ کرنے والے اداروں کی طرف سے عوام کے لئے پینے کے پانی کی ضرورت کو پورا کرنے کے لئے اور مساجد، امام بارگاہوں، مجالس کے مقامات، سبیلوں اور جلوس کے راستوں پر مطلوبہ واٹر ٹینکرز فراہم کئے جائیں۔