Raza Musani 
اسلام آباد: کویت اور پاکستان کے درمیان دفاعی شعبے میں تعاون کا معاہدہ ہوگیا ہے۔ معاہدے کا مقصد دونوں ممالک کے درمیان فوجی تربیت، تعلیم اور مسلح افواج میں تعاون کے لیے فریم ورک قائم کرنا ہے۔ معاہدے میں تکنیکی ماہرین، سائنسی وتکنیکی تعاون، ملٹری انٹیلیجنس اور دیگر شعبوں کا احاطہ کیا گیا ہے۔ معاہدے پر عمل درآمد کے لیے دونوں ممالک ایگزیکٹو پروٹوکول اور پروگرام کے ذریعے سالانہ منصوبے تیار کریں گے۔ معاہدہ مختلف سطحوں پر سرکاری دوروں کے تبادلے کے ذریعے تعاون بڑھانے کا بھی بندوبست کرتا ہے۔ معاہدے پر عملدرآمد اور رابطہ کاری اور نگرانی کے لیے مشترکہ فوجی کمیٹی قائم کی جائے گی، دونوں ممالک کے وزرائے دفاع کی مقرر کردہ کمیٹی سال میں ایک بار اجلاس منعقد کریں گے، دونوں فریقوں کے درمیان تبادلہ شدہ خفیہ معلومات کے تحفظ کی دفعات شامل ہیں۔ کسی تنازع کی صورت میں کسی تیسرے فریق یا ملکی یا بین الاقوامی عدالت سے رجوع نہیں کیا جائے گا۔
