کراچی: آئی ایس او کے تحت یوم القدس کے سلسلے میں 14 رمضان المبارک کو آل پارٹیز کانفرنس منعقد ہوگی

کراچی : امامیہ اسٹوڈنٹس آرگنائزیشن پاکستان کراچی نے عالمی یوم القدس کی مناسبت سے 14 رمضان المبارک کو منعقد ہونے والی آل پارٹیز کانفرنس کی دعوتی مہم شروع کردی ہے۔پہلےمرحلے میں آئی ایس او کراچی کے وفد نے ڈویژنل ڈپٹی جنرل سیکریٹری محمد رضوی کی سربراہی میں عوامی نیشنل پارٹی سندھ کے جنرل سیکریٹری یونس بونیری اور سابق صدر کراچی بار ایسوسی ایشن حیدر امام رضوی سے ملاقات کی اور انہیں کانفرنس میں شرکت کی دعوت دی۔ دونوں رہنماؤں نے آئی ایس او کی اس کاوش کو سراہتے ہوئے اپنی شرکت کی یقین دہانی بھی کروائی۔اس موقع پر گفتگو کرتے ہوئے آئی ایس او کے رہنماؤں نے کہا کہ آل پارٹیز کانفرنس کے انعقاد کا مقصد عالم اسلام کے مشترکہ مسئلہ یعنی مسئلہ فلسطین کے حق میں اور غاصب صہیونی ریاست اسرائیل کے خلاف اور پاکستان سمیت عالم اسلام میں امریکی و صہیونی سازشوں کو بے نقاب کرنے کیلئے تمام سیاسی و مذہبی قیادت کو ایک چھتری تلے لانا ہے، تاکہ فلسطین کے حق میں اور صیہونی و امریکی جنایت کاریوں کے خلاف پاکستان سے بھی ایک موثر آواز اٹھ سکے۔