Raza Musani 
لندن : انسانی حقوق کے ادارے ہیومن رائٹس واچ نے غزہ میں شہریوں کے خلاف اسرائیلی حکومت کے متعدد لرزہ خیز جرائم کو دستاویزی شکل دے دی۔ ہیومن رائٹس واچ کے ایگزیکٹو ڈائریکٹر فلپ بولوبین نے الجزیرہ چینل کو دیے گئے انٹرویو میں واضح کیا کہ امریکی حکومت نے غزہ میں جاری سفاکیت اور ہولناک مظالم کو روکنے کے لیے کوئی سنجیدہ قدم نہیں اٹھایا۔ انہوں نےکہا کہ مقبوضہ مغربی کنارے میں صیہونی آبادکاروں کی دہشت گردی عروج پر پہنچ چکی ہے ۔ جس کے نتیجے میں پناہ گزین کیمپوں کے مکینوں کی جبری بے دخلی عمل میں آئی ہے۔ اسرائیلی حکومت نے فلسطینی پناہ گزینوں کے اپنی سرزمین پر واپسی کے حق کی راہ میں رکاوٹیں کھڑی کر رکھی ہیں۔ انہوں نے کہا کہ فلسطینیوں کی جبری ہجرت کا سلسلہ اب بھی جاری ہے اور اسرائیلی حکومت جو کچھ کر رہی ہے وہ انسانیت کے خلاف سنگین جرم کے زمرے میں آتا ہے۔
