اسرائیل کا لبنان کے جنوبی سرحدی علاقے میں کیمیائی مواد کا چھڑکاؤ

بیروت : اسرائیلی فوج نے لبنان کے جنوبی سرحدی علاقے میں کیمیائی مواد کا چھڑکاؤ کردیا۔ اقوام متحدہ نے خبردار کیا ہےکہ کیمیائی مادے کے اسپرے کے سنگین نتائج برآمد ہو سکتے ہیں ۔ لبنان کے صدر جوزف عون نے جنوبی لبنان پر زہریلے مادے کے چھڑکاؤ کو اسرائیل کا ماحولیاتی جرم قرار دیا۔ انہوں نے کہا کہ یہ خطرناک طرزِ عمل زرعی زمینوں، شہریوں کے روزگار، صحت اور ماحول کو شدید خطرات سے دوچار کر رہا ہے۔ انہوں نے کہا کہ اسرائیلی اقدام لبنانی شہریوں، ان کی زمین اور ماحول کے خلاف کھلی جارحیت ہے۔ انہوں نے متعلقہ سرکاری اداروں کو سفارتی اور قانونی سطح پر تمام ممکنہ اقدامات کی ہدایت کی۔
اقوام متحدہ کے ترجمان برائے انسانی حقوق ثمین الخیتان نے کہا کہ اگر کیمیائی مواد کے اسپرے کی رپورٹس درست ثابت ہوئیں تو یہ بین الاقوامی انسانی قانون کے تحت سنگین خدشات کو جنم دیں گی۔ ترجمان نے مطالبہ کیا کہ اسرائیلی طیاروں کی جانب سے اسپرے کیے گئے مادوں کی نوعیت اور ان کے شہری آبادی اور ماحول پر اثرات جاننے کے لیے شفاف اور فوری تحقیقات کی جائیں۔