غزہ جنگ میں اسرائیل کو بھاری جانی، نفسیاتی اور مالی نقصانات ہوئے، اسرائیلی جنرل

تل ابیب : اسرائیلی ریزرو جنرل اسحاق برک نے اعتراف کیا ہےکہ غزہ جنگ کے دوران اسرائیل کو بھاری جانی، نفسیاتی اور مالی نقصانات اٹھانا پڑے ہیں۔ جبکہ حماس کو شکست دینے میں ناکامی ایک واضح حقیقت بن چکی ہے۔ اسرائیلی چینل 13 کو انٹرویو میں جنرل اسحاق برک نے انکشاف کیا کہ اسرائیل میں دو ہزار سے زائد ہلاکتیں اور دسیوں ہزار زخمی ہو چکے ہیں۔ ان کا کہنا تھا کہ گزشتہ دو برسوں میں اسرائیل نے قومی اور سماجی استحکام کھو دیا ہے، جبکہ سینکڑوں ارب شیکل کا مالی نقصان بھی ہوا۔ برک نے واضح کیا کہ اسرائیل جاری جنگ کے باوجود حماس کو شکست دینے میں ناکام رہا ہے۔
انہوں نے انسانی نقصانات کے ساتھ ساتھ فوجیوں اور آبادکاروں میں شدید نفسیاتی اور جسمانی صدمات کا بھی اعتراف کیا۔ برک نے کہا کہ امریکا کے صدر ڈونلڈ ٹرمپ نے اسرائیل کو جمود کا شکار اور اپنے اہداف حاصل کرنے میں ناکام سمجھا جس کے بعد انہوں نے مداخلت کا فیصلہ کیا۔ دوسری جانب اسرائیلی فوج میں پی ٹی ایس ڈی کے کیسز میں تقریباً 40 فیصد اضافہ ہو چکا ہے، جبکہ 22 ہزار سے زائد اہلکار جنگی صدمات کا علاج کروا رہے ہیں۔