اسرائیل نے مشرقی یروشلم میں نسلی تطہیر کا کام تیز کردیا

رام اللہ : صیہونی حکومت نے مشرقی یروشلم میں نسلی تطہیر کا کام تیز کردیا ہے۔ سلوان قصبے سے گیارہ فلسطینی خاندانوں کو بیدخل کرکے ان کے گھروں پر قبضہ کرلیا گیا۔ مقامی افراد اور انسانی حقوق کی تنظیموں کے مطابق اسرائیلی پولیس آبادکاروں کو لیکر باتن الحوا کے علاقے میں پہنچی اور انہوں نے اپارٹمنٹس کی کھڑکیوں سے فرنیچر باہر پھینک کر عمارتوں پر اسرائیلی جھنڈا لگا دیا۔
اسرائیلی حقوق گروپ بیت سیلم کے مطابق سلوان میں تقریباً بائیس سو افراد جبری بے دخلی کے خطرے سے دوچار ہیں۔ گروپ نے کہا کہ اسرائیل ایران کے خلاف جنگ کے بہانے فلسطینی علاقوں میں مزید آبادکار منتقل کر رہا ہے تاکہ آبادیاتی توازن بدل کر علاقے کو یہودی بنایا جا سکے۔