Raza Musani 
لندن : سیٹلائٹ تصاویر سے ظاہر ہوتا ہے کہ اسرائیل نے غزہ میں زرد لکیر کو مزید اندر تک منتقل کر دیا ہے جس سے فلسطینیوں میں بے چینی پھیل گئی ہے۔ بی بی سی کے جائزے کے مطابق، بیت لاہیہ، جبالیا اور الطفاح میں اسرائیل نے پہلے بلاکس نصب کیے اور بعد میں اُنہیں غزہ کے اندر مزید آگے منتقل کردیا۔ مجموعی طور پر سولہ مقامات پر یہ تبدیلی دیکھی گئی۔رپورٹ کے مطابق الطفاح میں سات بلاکس کو ستائیس نومبر سے پچیس دسمبر کے درمیان دو سو پچانوے میٹر حرکت دی گئی۔ رپورٹ کے مطابق دو سو پانچ بلاکس بھی نقشوں کے مطابق لائن سے کہیں زیادہ اندر نصب ہیں۔ اسرائیلی فوج نے ان دعوؤں کی تردید کرتے ہوئے کہا کہ وہ زمینی حالات اور موجودہ صورتحال کے مطابق صرف یلو لائن کی بصری نشاندہی کررہی ہے۔ وزیر دفاع اسرائیل کاٹز نے اکتوبر میں وارننگ دی تھی کہ یلو لائن عبور کرنیوالے کسی بھی شخص کو آگ کا سامنا کرنا پڑے گا اور اس کے بعد اس لائن کے گرد متعدد مہلک واقعات پیش آئے ہیں۔
