اسلام آباد: مسجد وامام بارگاہ میں خودکش حملہ، 50 نمازی شہید، 150 سے زائد زخمی

اسلام آباد: اسلام آباد کے علاقے ترلائی کی مسجد وامام بارگاہ خدیجتہ الکبری میں نماز جمعہ کے دوران خودکش حملہ کیا گیا ہے۔ تفصیلات کے مطابق خودکش دھماکا مسجد و امام بارگاہ میں اس وقت ہوا جب نمازِ جمعہ ادا کی جارہی تھی۔ خودکش بمبار نے مسجد میں داخلے سے روکنے پر خود کو دھماکے سے اڑا لیا۔ دھماکے میں 50 سے زائد نمازی شہید اور 150 سے زائد زخمی ہوگئے۔ اسلام آباد پولیس کے مطابق دھماکا مسجد کے دروازے پر اس وقت ہوا جب چیکنگ پر مامور افراد نے خودکش حملہ آور کو مسجد میں داخل ہونے سے روکنے کی کوشش کی۔ دھماکا اتنا زوردار تھا جس سے مسجد کو شدید نقصان پہنچا۔ پہلی صف تک لوگ زخمی ہوئے۔ زخمیوں اور لاشوں کو قریبی اسپتال منتقل کیا گیا جہاں کئی زخمیوں کی حالت تشویشناک ہے۔ جس سے اموات میں اضافے کا خدشہ ہے۔
وفاقی دارالحکومت میں مسجد میں خودکش دھماکے کے بعد شہر کے تمام اسپتالوں میں ایمرجنسی نافذ کردی گئی۔