Raza Musani 
تہران: اسرائیل اور ایران نے ایک دوسرے کیخلاف رات بھر فضائی اور میزائل حملے کئے۔ ادھر عراقی مزاحمت کاروں نے امریکا کا ری فیولنگ طیارہ مارا گرایا جبکہ دوسرے طیارے کو نقصان پہنچا۔ اسرائیل نے 24 گھنٹوں میں ایران پر 200 سے زائد اہداف پر حملوں کا دعویٰ کیا ہے۔ لڑاکا طیاروں نے بڑے پیمانے پر حملے کیے، ایران کے بیلسٹک میزائل لانچرز، فضائی دفاعی نظام اور اسلحہ تیار کرنے والے مراکز کو نشانہ بنایا۔ اسرائیلی فوج نے ایران میں نیوکلیئر پروگرام کی اہم سائٹس پر بھی حملوں کا دعویٰ کیا ہے۔ تہران کے قریب طالقان میں واقع سائٹ کو جنگی جہازوں نے نشانہ بنایا ہے۔ ادھر ایران نے تل ابیب کے مرکز اور امریکی فوج کے اڈوں کی جانب میزائل اور ڈرون داغے۔ حملوں کے بعد اسرائیل کے بن گورین ائیرپورٹ پر افراتفری مچ گئی۔ پاسداران انقلاب نے دعویٰ کیا ہے کہ امریکا کے ایئر کرافٹ کیریئر یو ایس ایس ابراہم لنکن کو میزائلوں سے نشانہ بنایا جس سے اسے شدید نقصان پہنچا ہے۔
عراقی مزاحمت کاروں نے امریکا کا ری فیولنگ طیارہ مار گرایا اور طیارے میں سوار تمام اہلکار ہلاک ہوگئے۔ امریکی سینٹرل کمانڈ نے بھی مغربی عراق میں امریکی طیارہ گرنے کی تصدیق کرتے ہوئے کہا تھا کہ ایندھن بھرنے والے طیارہ کے سی 135 مغربی عراق میں گرا اور دوسرا بحفاظت لینڈ کر گیا۔ جبکہ اربیل میں فوجی اڈے پر حملے میں ایک فرانسیسی فوجی ہلاک اور کئی زخمی ہوگئے۔ فرانسیسی صدر ایمانوئل میکرون نے کہا ہے کہ کردستان علاقے میں ہونے والے ایک حملے میں کئی فرانسیسی فوجی زخمی بھی ہوئے۔
