عراق نے اسرائیل سے تعلقات کی بحالی کا امکان مسترد کردیا

بغداد : عراق کے عبوری وزیرِاعظم محمد شیاع السودانی نے بغداد میں سینٹ جوزف چرچ میں کرسمس کی تقریبات سے خطاب میں کہا کہ عراق کو کسی بھی قسم کی نارملائزیشن کی ضرورت نہیں اور نہ ہی یہ اصطلاح عراقی سیاست کا حصہ ہے۔ نارملائزیشن کے تصور کی ملک کی سیاسی لغت میں کوئی جگہ نہیں ہے۔ انہوں نے کہا کہ عراق کا مؤقف اس کے عوام کے بنیادی اصولوں کی عکاسی کرتا ہے۔ عراق خود کو خطے میں استحکام کے ایک مرکز کے طور پر مضبوط بنانے کی کوشش کر رہا ہے۔ واضح رہے کہ بغداد اسرائیل کو تسلیم نہیں کرتا اور رسمی تعلقات کی بارہا مخالفت کر چکا ہے۔ عراقی پارلیمنٹ نے دو ہزار بائیس میں اسرائیلی اداروں اور افراد سے رابطے کو جرم قرار دینے والا قانون بھی پاس کیا۔