عراق: مقتدی الصدر کی جماعت 73 نشستوں پر کامیاب، دوبارہ گنتی میں 5 نشستوں کے نتائج تبدیل

بغداد :عراقی الیکشن کمیشن نے سینکڑوں بیلٹ بکسوں کی دوبارہ گنتی کے بعد الیکشن کے حمتی نتائج کا اعلان کردیا۔ نتائج کے مطابق صدر تحریک نے حالیہ انتخابات میں 329 نشستوں میں سے 73 پر کامیابی حاصل کی ہے۔ الیکشن کمیشن کے مطابق دوبارہ گنتی کے نتیجے میں بغداد، اردبیل، نینوا، کرکوک اور بصرہ کی 5نشستوں کے نتائج میں تبدیلی آئی ہے۔ اسپیکر محمد الحلبوشی کے تقدم گروپ نے 37 نشستوں میں کامیابی حاصل کی ہے جبکہ سابق وزیراعظم نوری المالکی کی جماعت کو 33نشستیں ملی ہیں۔ حشد الشعبی کی 17 نشستیں برقرار ہیں۔ کردستان ڈیموکریٹک پارٹی کو31 جبکہ پیٹریاٹک یونین آف کردستان کو 18 نشستیں ملی ہیں۔ الیکشن کمیشن کے مطابق ووٹنگ کی شرح 44 فیصد رہی جو 2003 میں پہلے الیکشن کے بعد سب سے کم ہے۔