عراق کا مشرق وسطیٰ اور یورپ کو ملانے کے منصوبے کا اعلان

بغداد: عراق نے مشرق وسطیٰ اور یورپ کو ملانے کے لئے 17 ارب ڈالر کے روٹ ٹو ڈیویلپمنٹ منصوبے کا اعلان کردیا۔ عراقی وزیراعظم محمد شیعہ السوڈانی نے بغداد میں خلیج تعاون تنظیم کے رکن ممالک کی کانفرنس سے خطاب میں منصوبے کا اعلان کیا۔ انہوں نے کہا کہ یہ منصوبہ معاشی لائن فراہم کرے گا اور تاریخ اور ثقافتوں کو جوڑ کر ایسا خطہ بنائے گا جہاں کوئی بھی سرمایہ کاری کرسکے۔ ان کا کہنا تھا کہ آج آپ کی یہاں ایک مستحکم اور محفوظ بغداد میں موجودگی، مواقعوں اور ارادوں سے بھرپور ہے، اور اس کے ذریعے ہم حل تلاش کریں گے۔روٹ ٹو ڈیویلپمنٹ منصوبہ 1200 کلومیٹر طویل دو رویہ ریل نیٹ ورک پر مشتمل ہوگا۔ یہ منصوبہ عراق کے جنوبی ساحل پر واقع الفا بندرگاہ کو ترکیہ سے متصل سڑکوں اور ریلوے ٹریکس سے جوڑے گا۔ اور آگے یورپ کے ریلوے ٹریکس اور سڑکوں کے جال سے منسلک ہوجائے گا۔ الفا بندرگاہ سےروانہ ہونے والے مسافروں اور سامان کیلئے نیا موٹروے بھی تعمیر کیا جائے گا۔ عراقی حکومت نے منصوبے کا تخمینہ 17 ارب ڈالر لگایا ہے جس سے 4 ارب ڈالر سالانہ کی آمدنی ہوگی اور تقریباً ایک لاکھ ملازمتوں کے مواقع پیدا ہوں گے۔