Raza Musani 
واشنگٹن : ایران کے امریکا سے رابطے منقطع کرنے پر اسرائیل لبنان میں جنگ روکنے پر رضامند ہوگیا۔ امریکی صدر ڈونلڈ ٹرمپ نے اسرائیلی وزیراعظم نیتن یاہو سے رابطے کے بعد دعویٰ کیاہےکہ اسرائیل اور حزب اللہ لبنان میں جنگ بندی پر متفق ہوگئے۔ انہوں نے کہاکہ ان کی اسرائیلی وزیراعظم بنیامین نیتن یاہو کے ساتھ ہونے والی بات چیت کے بعد لبنان کی صورتحال میں اہم پیش رفت ہوئی ہے اور بیروت کی جانب کسی بھی فوجی پیش قدمی کو روک دیا گیا ہے۔ سوشل میڈیا پیغام میں ٹرمپ نے کہا کہ ان کی اسرائیلی وزیراعظم کے ساتھ انتہائی نتیجہ خیز گفتگو ہوئی، جس کے بعد بیروت میں فوج بھیجنے کا کوئی منصوبہ نہیں رہا، جبکہ جو فوجی دستے روانہ ہو چکے تھے انہیں بھی واپس بلا لیا گیا ہے۔ امریکی صدر نے مزید دعویٰ کیا کہ ان کے نمائندوں نے حزب اللہ کے ساتھ بھی رابطہ کیا، جس کے نتیجے میں فریقین فائرنگ بند کرنے پر آمادہ ہو گئے ہیں۔ ٹرمپ کے مطابق اسرائیل نے حزب اللہ پر حملہ نہ کرنے اور حزب اللہ نے اسرائیل کے خلاف کارروائی نہ کرنے پر اتفاق کیا ہے، جس سے سرحدی کشیدگی میں کمی آنے کی توقع ہے۔ ٹرمپ نے دعویٰ کیا کہ ایران کے ساتھ بھی مذاکرات تیزی سے جاری ہیں۔
