Raza Musani 
تہران : ایران نے امریکی حملوں میں نشانہ بننے والی جوہری تنصیبات کے معائنے سے انکار کرتے ہوئے آئی اے ای اے سے جنگ کے بعد کی شرائط طے کرنے کا مطالبہ کر دیا ہے۔
تہران میں کابینہ اجلاس کے بعد میڈیا سے گفتگو کرتے ہوئے ایران کے جوہری ادارے کے سربراہ محمد اسلامی نے کہا کہ ایران کسی بھی ایسے معائنے کو قبول نہیں کرے گا جس کے لیے کوئی واضح فریم ورک موجود نہ ہو۔ انہوں نے کہا کہ تباہ شدہ جوہری تنصیبات کے معائنے پر سیاسی اور نفسیاتی دباؤ کا کوئی اثر نہیں پڑے گا۔ ان کا کہنا تھا کہ اگر جنگ کے بعد کی شرائط طے کی جاتی ہیں تو آئی اے ای اے کو انہیں باضابطہ طور پر اعلان کے ذریعے واضح کرنا ہوگا، تاکہ ایران اس کے مطابق عمل کرتے ہوئے معائنوں کی اجازت دے سکے۔
ایران نے اس مؤقف سے تحریری طور پر بھی آئی اے ای اے کو آگاہ کر دیا ہے۔ انہوں نے زور دیا کہ یہ واضح، متعین اور ضابطہ بند کیا جانا ضروری ہے کہ اگر کسی ایسے جوہری صنعت پر فوجی حملہ کیا جائے جو آئی اے ای اے کے ساتھ رجسٹرڈ اور اس کی نگرانی میں ہو تو اس صورت میں کیا اقدامات کیے جائیں گے۔
