Raza Musani 
تہران : ولی امر المسلمین آیت اللہ العظمی سید علی خامنہ ای نے کہا ہے کہ عالمی طاقتوں کے درمیان دشمنی اور جوہری طاقتوں کی بڑھتی ہوئی محاذ آرائی نے دوسرے ممالک کے لیے چیلنجز کو مزید بڑھا دیا ہے۔پارلیمنٹ کے ارکان سے خطاب میں ولی امر مسلمین نے کہا کہ دنیا کے موجودہ حالات نے تمام ملکوں کے لیے بہت سی دشواریاں پیدا کردی ہیں۔بڑی طاقتوں کی محاذ آرائی، ایٹمی طاقتوں کی ایک دوسرے کو دھمکیاں، یورپ کے قریب جنگ کا آغاز ، عالمی وبا کا پھیلاؤ اور غذائی قلت ایسے اسباب ہیں جس نے دنیا کو ایسے مقام پر لا کھڑا کیا ہے جہاں ملکوں کا انتظام چلانا مشکل اور پیچیدہ ہوگیا ہے۔ ولی امر مسلمین نے کہا کہ ایران دوسرے ممالک کو درپیش چیلنجز کے ساتھ ساتھ عالمی طاقتوں کے پیدا کردہ چیلنجز سےبھی نبرد آزما ہے۔ اس کی وجہ یہ ہے کہ ایران نے دنیا میں اسلامی جمہوریت کا نیا نمونہ پیش کرکے، تسلط پسندانہ نظام کے حساب کتاب کو درھم برھم کر دیا ہے۔ ایران ہر دشمنی اور مخاصمت کے مقابلے میں سینہ سپر ہے اور ترقی اور کامیابی کے راستے پر گامزن ہے۔
