Raza Musani 
دمشق: ایران کے صدر ابراہیم رئیسی شام کے تاریخی دورہ پر ہیں، اس دوران انہوں نے شامی صدر بشار الاسد سے ملاقات کی۔ ایرانی صدر ابراہیم رئیسی اعلیٰ سطح کے وفد کے ہمراہ دور روزہ دورے پر دمشق پہنچے تو شام کے وزیر اقتصادیات سمر الخلیل نے مہمان کا استقبال کیا۔ ایران نے اس دورے کو علاقائی معاملات میں اپنی اسٹریٹیجک فتح کی علامت قرار دیا ہے۔ ابراہیم رئیسی نے صدر بشار الاسد سے ملاقات کی جس میں دوطرفہ تعلقات کے فروغ پر تبادلہ خیال کیا گیا۔ ابراہیم رئیسی نے شام کی تعمیر نو اور جنگ کی وجہ سے ملک چھوڑنے والوں کی واپسی پر زور دیا۔ انہوں نے کہا کہ ایران اور شام کے تعلقات مکمل طور پر اسٹریٹجک ہیں۔ آج خطے میں ہر ایک پر واضح ہے کہ اسلامی جمہوریہ ایران ایک مضبوط ستون ہے جس پر ہر کوئی اعتماد کر سکتا ہے اور یہ علاقائی ترقی میں اہم اور موثر کردار ادا کرتا ہے۔ انہوں نے زور دے کر کہا کہ دشمنوں نے شام کو ضم کرنے اور دمشق کے علاقائی ممالک کے ساتھ تعلقات کو نقصان پہنچانے کی پوری کوشش کی۔ ایرانی صدر نے شام کی خودمختاری اور علاقائی سالمیت کے احترام پر زور دیا۔ دورے کے دوران دونوں ممالک تعاون کو فروغ دینے کے لیے کئی معاہدوں اور مفاہمت کی یادداشتوں پر دستخط کریں گے۔2011 میں ایرانی صدر احمدی نژاد کے بعد یہ کسی بھی ایرانی صدر کا شام کا پہلا دورہ ہے۔ ایرانی صدر مذہبی مقامات کا بھی دورہ کریں گے۔
