Raza Musani 
انقرہ : ایران امریکا مذاکرات کیلئے ترکیہ، پاکستان، مصر اور سعودی عرب نے کوششیں تیز کردیں۔ چاروں ممالک کا اہم اجلاس جلد پاکستان میں متوقع ہے۔ ترک وزیر خارجہ ہاکان فیدان نے کہا ہےکہ چاروں ممالک کے اجلاس میں ایران جنگ، مذاکرات اور ممکنہ اقدامات کا جائزہ لیا جائے گا۔ انہوں نے اسرائیلی توسیع پسندی کو خطے میں انتشار کی بڑی وجہ قرار دیتے ہوئے کہا کہ ترکیہ کی اولین ترجیح اس کشیدگی کو پھیلنے سے روکنا ہے۔ فیدان کے مطابق تمام فریقین امن کے خواہاں دکھائی دیتے ہیں سوائے اسرائیل کے، جو امریکا کی سیاست پر اثرانداز ہو کر اپنے علاقائی مفادات کو آگے بڑھا رہا ہے۔ انہوں نے خبردار کیا کہ ایران کی جانب سے خلیجی ممالک پر میزائل اور ڈرون حملوں کے بعد ردعمل میں شدت طویل المدتی نتائج کا باعث بن سکتی ہے اور یہ صورتحال اسلامی ممالک کے درمیان طویل تنازع کو جنم دے سکتی ہے۔انہوں نے خبردار کیا کہ جنگی شدت میں اضافہ مذاکراتی عمل کو ناقابل واپسی نقصان پہنچا سکتا ہے۔
