امریکا کے ساتھ مذاکرات کے مقام پر مشاورت جاری ہے، ایران

تہران: ایران اور امریکا نے آئندہ دنوں میں مذاکرات کی تصدیق کردی ۔ ایران نے کہاہے کہ مذاکرات کے مقام پر مشاورت جاری ہے اور حتمی فیصلہ جلد سامنے لایا جائے گا۔
ایرانی وزارتِ خارجہ کے ترجمان اسماعیل بقائی نے کہا ہے کہ امریکا کے ساتھ آئندہ دنوں میں مذاکرات کےلیے تمام تیاریاں مکمل کرلی گئی ہیں۔ ترکیہ، عمان اور دیگر علاقائی ممالک نے میزبانی کی پیشکش کی ہے مقام کے حوالے سے تفصیلات حتمی ہوتے ہی عوام کو آگاہ کر دیا جائے گا۔ ترجمان نے واضح کیا کہ مذاکرات کے وقت اور مقام کو میڈیا قیاس آرائی کا موضوع نہیں بننا چاہیے۔ بقائی نے ایران اور امریکا کے درمیان سفارتی عمل میں تعاون کرنے والے علاقائی ممالک کا شکریہ ادا کیا۔
ادھر امریکی صدر ٹرمپ نے کہا ہے کہ ایران کے ساتھ مذاکرات کررہے ہیں، امید ہے کامیاب ہوں گے۔ انہوں نے مذاکرات کے مقام کے سوال پر کہا کہ اگلی ملاقات کہاں ہوگی، اس کا انہیں ابھی علم نہیں۔ ایران کو بات چیت کا موقع ملا لیکن وہ نتیجہ خیز ثابت نہیں ہوا جس کے بعد ہم نے ایران کے خلاف آپریشن مڈ نائٹ ہیمر کیا۔