Raza Musani 
اسلام آباد: امریکی پابندیوں کے بڑھتے ہوئے دباؤ کے پیشِ نظر مسافروں میں پھیلی بے چینی کو دور کرنے کے لیے ایرانی فضائی کمپنی ایران ایئر ٹور ایئر لائنز نے ایک اہم وضاحتی نوٹس جاری کیا ہے۔ اعلامیے کے مطابق، پاکستان اور ایران کے درمیان تمام پروازیں اپنے طے شدہ شیڈول کے مطابق بغیر کسی تعطل کے جاری ہیں۔
ایئر لائن ترجمان نے واضح کیا ہے کہ امریکی محکمہ خزانہ کی حالیہ میڈیا رپورٹس کے بعد یہ افواہیں گردش کر رہی تھیں کہ 23 ستمبر سے ایرانی پروازیں مکمل بند ہو جائیں گی۔ کمپنی نے مسافروں کو آگاہ کیا ہے کہ امریکی پابندیوں کے اس دباؤ کا بنیادی ہدف فیول سپلائرز، ٹکٹ سیلز اور ایئرپورٹ سروسز فراہم کرنے والے ادارے ہیں۔ اس کا یہ مطلب ہرگز نہیں کہ تمام بین الاقوامی پروازیں خودکار طور پر بند یا منسوخ ہو رہی ہیں۔ ایران ایئر ٹور انتظامیہ کا کہنا ہے کہ ہمیں ایئر لائن یا کسی بھی متعلقہ پاکستانی یا بین الاقوامی اتھارٹی کی جانب سے پروازوں کی معطلی یا منسوخی کا کوئی سرکاری نوٹس موصول نہیں ہوا۔
ترجمان نے مسافروں اور ٹریول ایجنٹس سے اپیل کی ہے کہ وہ غیر تصدیق شدہ اور افواہوں پر مبنی خبروں پر کان دھرنے کے بجائے صرف ایئر لائن کے آفیشل ذرائع پر بھروسہ کریں۔ یاد رہے کہ ایران اور پاکستان کے درمیان زائرین، سیاحوں اور تاجروں کے لیے یہ براہِ راست فضائی روابط انتہائی اہمیت کے حامل ہیں۔ ایئر لائن نے یقین دہانی کرائی ہے کہ یہ آپریشنز انشاء اللہ مستقبل میں بھی جاری رہیں گے۔
